Ymgynghoriad ar bynciau Cyfrifiad 2031

Trosolwg

Mae'r ymgynghoriad hwn hefyd ar gael yn Saesneg.

Ynglŷn â’r ymgynghoriad ar bynciau’r Cyfrifiad 2031

Mae gwybodaeth am boblogaeth Cymru a Lloegr yn hanfodol i weithrediad ein cymdeithas. Mae'n llywio penderfyniadau am wasanaethau cyhoeddus ac yn ein helpu i ddeall yr economi, iechyd y cyhoedd ac anghydraddoldeb. Gan adeiladu ar ein dealltwriaeth o anghenion defnyddwyr o ymgynghoriad 2023 ar ddyfodol ystadegau am y boblogaeth a mudo, a thrwy ymgysylltu'n eang â rhanddeiliaid dros y degawd diwethaf, rydym yn eich gwahodd i ymateb i'r ymgynghoriad hwn i lywio penderfyniadau ar ba bynciau a gaiff eu cynnwys yn y cyfrifiad nesaf.

Mae'r ymgynghoriad hwn, sy'n rhedeg tan 4 Chwefror 2026, yn cynrychioli'r cam nesaf yn ein gwaith ymgysylltu parhaus â defnyddwyr ystadegau am y boblogaeth wrth i ni baratoi ar gyfer Cyfrifiad 2031. Yn dilyn yr ymgynghoriad, byddwn yn parhau i geisio safbwyntiau rhanddeiliaid i gefnogi'r broses o ddatblygu cwestiynau'r cyfrifiad ac allbynnau'r cyfrifiad.

Defnyddir ymatebion i'r ymgynghoriad hwn hefyd at y diben eilaidd o lywio gwaith perthnasol arall o fewn y SYG sy'n mynd y tu hwnt i Gyfrifiad 2031. Mae hyn yn cynnwys blaenoriaethu ystadegau sy'n seiliedig ar ddata gweinyddol a'r broses barhaus o adolygu safonau wedi'u cysoni Gwasanaeth Ystadegol y Llywodraeth ar gyfer casglu data.

Pam bod eich barn yn bwysig

Diolch am eich adborth hyd yma; rydym yn gwerthfawrogi eich barn a'ch ymgysylltiad parhaus yn fawr. Bydd eich mewnbwn parhaus yn helpu i sicrhau bod Cyfrifiad 2031 yn adlewyrchu anghenion newidiol pobl, cymunedau a sefydliadau ledled Cymru a Lloegr. Drwy gymryd rhan yn yr ymgynghoriad hwn, byddwch yn helpu i lywio'r pynciau y byddwn yn eu cynnwys; fel bod y data a gesglir gennym yn cefnogi penderfyniadau gwell a chymunedau cryfach ac yn rhoi darlun cliriach o sut mae pobl yn byw ac yn gweithio.

Yr hyn rydym ni'n ei ofyn

Hoffem glywed sut rydych yn defnyddio data'r cyfrifiad a'ch gofynion ar gyfer data ar bynciau o Gyfrifiad 2031.

Ar gyfer pob un o'r 13 o grwpiau pwnc y cyfrifiad, byddwn yn holi ynghylch:

• y dibenion y byddwch yn defnyddio data'r cyfrifiad ar eu cyfer

• eich gofynion ar gyfer data Cyfrifiad 2031

• sut rydych yn defnyddio data'r cyfrifiad ar gyfer ardaloedd daearyddol bach, er mwyn deall poblogaethau bach, gwneud cymariaethau dros amser ac ar draws ardaloedd daearyddol

• sut rydych yn cymharu data'r cyfrifiad â newidynnau eraill y cyfrifiad (dadansoddiad amlamrywedd)

Gofynnir cwestiynau tebyg ar gyfer pynciau newydd a all fod yn ofynnol ar gyfer Cyfrifiad 2031.

Bydd y cwestiynau hefyd yn holi ynghylch eich gofynion ar gyfer grwpiau data (seiliau cyfrifo), sefydliadau cymunedol a safonau wedi'u cysoni. Defnyddir y wybodaeth a gesglir hefyd i lywio blaenoriaethau ar gyfer data gweinyddol a gofynion ar gyfer safonau wedi'u cysoni Gwasanaeth Ystadegol y Llywodraeth.

Ochr yn ochr â'r ymgynghoriad ar bynciau hwn, rydym hefyd yn ymgynghori ar y safon wedi'i chysoni ar gyfer casglu data ar ethnigrwydd. Diben yr ymgynghoriad hwn ar ethnigrwydd yw casglu barn am opsiynau ymateb blwch ticio ychwanegol a all fod yn ofynnol ar gyfer y safon newydd. Disgwyliwn i'r cwestiwn perthnasol yn y cyfrifiad gyd-fynd â'r safon hon yng Nghymru a Lloegr. Ceir rhagor o wybodaeth ar dudalen gysylltiedig yr ymgynghoriad ar gysoni'r gwaith o gasglu data ar ethnigrwydd, sy'n cau ar 4 Chwefror 2026.

Sut i ymateb

Mae'r ddogfen ymgynghori yn darparu gwybodaeth gefndirol am yr ymgynghoriad hwn, gan gynnwys pynciau a grwpiau pwnc rydym yn holi yn eu cylch, a beth sy'n hysbys eisoes am anghenion defnyddwyr ar gyfer pob un ohonynt. Mae hefyd yn nodi sut rydym yn gwerthuso ymatebion a ddaw i law, i gefnogi ein hargymhellion.

Rydym yn croesawu cyfraniadau gan holl ddefnyddwyr y cyfrifiad, gan gynnwys defnyddwyr profiadol data'r cyfrifiad a'r rhai sydd am ddefnyddio data'r cyfrifiad am y tro cyntaf.

Rydym yn eich annog yn gryf i ymateb drwy gwblhau'r holiadur ar-lein.

Gallwch lawrlwytho’r holiadur a’r ddogfen ymgynghori i’w hadolygu neu’i rhannu all-lein. Gallwch hefyd ddefnyddio’r lawrlwythiadau hyn i ymateb drwy e-bost neu drwy’r post os dymunwch. Gellir dod o hyd i ddolenni i lawrlwytho’r dogfennau ar y dudalen we hon, o dan y pennawd “Cysylltiedig”.

Mae copïau ffisegol o'r ymgynghoriad a'r holiadur ar gael ar gais. Mae fersiynau print mawr hefyd ar gael. Anfonwch ymatebion drwy e-bost i: Topic.Consultation@ons.gov.uk

Anfonwch ymatebion drwy'r post i:

Census Topic Consultation, Office for National Statistics, Segensworth Road, Titchfield, Hampshire, PO15 5RR

Gellir gwneud cais am fformatau amgen o'r ymgynghoriad dros y ffôn hefyd: 01329 444972.

Fe'ch gwahoddir i ymateb erbyn y dyddiad cau, sef 4 Chwefror 2026.

Byddwn yn cyhoeddi ymateb i'r ymgynghoriad hwn tua 12 wythnos ar ôl dyddiad cau yr ymgynghoriad.

Cyfrinachedd a diogelu data

Rydym yn ceisio bod mor agored â phosibl wrth wneud penderfyniadau. Fel rhan o hyn, byddwn yn cyhoeddi'r ymatebion a gawn. Caiff enwau sefydliadau sy'n ymateb eu cynnwys ynghyd â'u hymateb, a phan fydd ymatebwyr unigol yn rhoi caniatâd i'r SYG gyhoeddi eu henwau, caiff eu henwau eu cynnwys hefyd. Gallwch weld ein polisi preifatrwydd data.